Го́споди, Царю́ Небéсный, Утéшителю, Ду́ше и́стины, умилосéрдися и поми́луй мя, грéшнаго раба́ Твоего́, и отпусти́ ми недосто́йному, и прости́ вся, ели́ка Ти согреши́х днесь я́ко человéк, па́че же и не я́ко человéк, но и горéе скота́, во́льныя моя́ грехи́ и нево́льныя, вéдомыя и невéдомыя: я́же от ю́ности и от нау́ки злы, и я́же суть от на́гльства и уны́ния. А́ще и́менем Твои́м кля́хся, или́ поху́лих é в помышлéнии моéм; или́ кого́ укори́х; или́ оклевета́х кого́ гнéвом мои́м, или́ опеча́лих, или́ о чем прогнéвахся; или́ солга́х, или́ безго́дно спах, или́ нищ прии́де ко мне, и презрéх его́; или́ бра́та моего́ опеча́лих, или́ сва́дих, или́ кого́ осуди́х; или́ развелича́хся, или́ разгордéхся, или́ разгнéвахся; или́ стоя́щу ми на моли́тве, ум мой о лука́вствии ми́ра сего́ подви́жеся, или́ развращéние помы́слих; или́ объядо́хся, или́ опи́хся, или́ без ума́ смея́хся; или́ лука́вое помы́слих, или́ добро́ту чужду́ю ви́дев, и то́ю уя́звен бых сéрдцем; или́ неподо́бная глаго́лах, или́ греху́ бра́та моего́ посмея́хся, моя́ же суть безчи́сленная согрешéния; или́ о моли́тве не ради́х, или́ и́но что содéях лука́вое, не по́мню, та бо вся и бо́льша сих содéях. Поми́луй мя, Тво́рче мой Влады́ко, уны́лаго и недосто́йнаго раба́ Твоего́, и оста́ви ми, и отпусти́, и прости́ мя, я́ко Благ и Человеколю́бец, да с ми́ром ля́гу, усну́ и почи́ю, блу́дный, грéшный и окая́нный аз, и поклоню́ся, и воспою́, и просла́влю пречестно́е и́мя Твоé, со Отцéм, и Единоро́дным Его́ Сы́ном, ны́не и при́сно и во вéки. Ами́нь.

Что́ Ти принесу́, или́ что́ Ти возда́м, великодарови́тый Безсмéртный Царю́, щéдре и Человеколю́бче Го́споди, я́ко леня́щася менé на Твоé угождéние, и ничто́же бла́го сотво́рша, привéл еси́ на конéц мимошéдшаго дне сего́, обращéние и спасéние души́ моéй стро́я? Ми́лостив ми бу́ди грéшному и обнажéнному вся́каго дéла бла́га, возста́ви па́дшую мою́ ду́шу, оскверни́вшуюся в безмéрных согрешéниих, и отыми́ от менé весь по́мысл лука́вый ви́димаго сего́ жития́. Прости́ моя́ согрешéния, еди́не Безгрéшне, я́же Ти согреши́х в сей день, вéдением и невéдением, сло́вом, и дéлом, и помышлéнием, и всéми мои́ми чу́вствы. Ты Сам, покрыва́я, сохрани́ мя от вся́каго сопроти́внаго обстоя́ния Божéственною Твоéю вла́стию, и неизречéнным человеколю́бием, и си́лою. Очи́сти, Бо́же, очи́сти мно́жество грехо́в мои́х. Благоволи́, Го́споди, изба́вити мя от сéти лука́ваго, и спаси́ стра́стную мою́ ду́шу, и осени́ мя свéтом лица́ Твоего́, егда́ прии́деши во сла́ве, и неосуждéнна ны́не сном усну́ти сотвори́, и без мечта́ния, и несмущéн по́мысл раба́ Твоего́ соблюди́, и всю сатанину́ дéтель отжени́ от менé, и просвети́ ми разу́мныя о́чи сердéчныя, да не усну́ в смерть. И посли́ ми А́нгела ми́рна, храни́теля и наста́вника души́ и тéлу моему́, да изба́вит мя от враг мои́х; да воста́в со одра́ моего́, принесу́ Ти благода́рственныя мольбы́. Ей, Го́споди, услы́ши мя грéшнаго и убо́гаго раба́ Твоéго́, изволéнием и со́вестию; да́руй ми воста́вшу словесéм Твои́м поучи́тися, и уны́ние бесо́вское дале́че от менé отгна́но бы́ти сотвори́ Твои́ми А́нгелы; да благословлю́ и́мя Твоé свято́е, и просла́влю, и сла́влю Пречи́стую Богоро́дицу Мари́ю, Ю́же дал еси́ нам грéшным заступлéние, и прии́ми Сию́ моля́щуюся за ны: вéм бо, я́ко подража́ет Твоé человеколю́бие, и моля́щися не престаéт. Тоя́ заступлéнием, и Честна́го Креста́ зна́мением, и всех святы́х Твои́х ра́ди, убо́гую ду́шу мою́ соблюди́, Иису́се Христé Бо́же наш, я́ко Свят еси́ и препросла́влен во вéки. Ами́нь.