Владыко Господи Боже наш, послушавый Илию Фесвитянина, ревности ради к Тебе, и во время посылаемому земли дождю удержатися повелевый, таже паки молитвою его дождь плодоносный ей даровавый: сам Владыко всех от самаго твоего благоутробия умоляем, дождь волен даждь наследию твоему: и согрешенная нами презрев, дожди твоя ниспосли на требующая и просящая места: возвесели лице земли, нищих ради людей твоих, и младенцов, и скотов, и иных всех: зане к Тебе чают, еже дати пищу им во благое время. Ты бо еси Бог наш, Бог, еже миловати и спасати, и тебе славу возсылаем, Отцу, и Сыну, и Святому Духу, ныне и присно, и во веки веков. Аминь.

Господи Иисусе Христе, иже лоза сый истинная, и Отец Твой делатель, Ты и Апостолы нарекл еси рождиями: Тако и ныне Владыко, прииди на лозу сию, и насади; даждь ей хранителя помощь Твою, огради входы и исходы ея Твоим промыслом: избави ю от всякаго обстояния ея, от града, снега, мраза, от грозныя зимы, и ветров сожжения, от бури, и от всякаго нахождения, видимых же и невидимых врагов. Призри и посети виноград сей, егоже насади десница Твоя, да воздаст во время плоды своя: и да сподобимся и мы Твоею благодатию обимати его, и принести Тебе от него, во еже претворитися в кровь пречистаго тела Твоего. Тебе бо подобает всяка слава, честь и поклонение, со безначальным Твоим Отцем, и с пресвятым, и благим, и животворящим Твоим Духом ныне и присно и во веки веков. Аминь.

Владыко Господи Боже наш, власть имели всякия твари, Тебе молимся, и Тебе просим, якоже благословил и умножил еси стада Патриарха Иакова, благослови и стадо скотов сих раба Твоего (имя) и умножи, и укрепи, и сотвори е в тысящы, и избави е от насилия диавола, и от иноплеменник, и от всякаго навета врагов, и воздуха смертнаго, и губительнаго недуга: огради е святыми ангелы Твоими, всякую немощь, всякую зависть, и искушение чаровства же и волшебства, от действа находящыя диавольскаго, отгоняя от него: яко Твое есть царство, и сила, и слава, Отца и Сына, и Святаго Духа, ныне и присно, и во веки веков. Аминь.

Господи Боже наш, от пречистыя и пребогатыя длани Твоея, предлежащее пред очима Твоима семен подаяние принесохом Владыко, и сему Тебе вручитися молимся: не бо смеяхом в бездушных земли недрех заключити сия, аще не воззрим на повеление Твоего Величества, повелевающее родити, и прозябати земли, и дати семена сеющему, и хлеб в снедь. И ныне молимся Тебе Боже нага, услыши ны молящыяся Тебе, и отверзи нам сокровище Твое великое, и благое, и небесное, и излей благословение Твое, донележе удовлимся по неложным Твоим обещанием: и отжени от нас вся снедающая плод наш земный и всякое наказание праведно наводимое на ны, грех ради наших: и богатыя Твоя щедроты низпосли на вся люди Твоя, благодатию и человеколюбием единороднаго Твоего Сына, с нимже благословен еси, и с пресвятым и благим, и животворящим Твоим духом, ныне и присно, и во веки веков. Аминь.

Всемогущий и вечный Боже, сотворивший из ничего мир, (силою Своею) держащий его в пространстве и повелевший возделывать землю для существования рода человеческаго! Усердно прибегаем к милосердию Твоему: благослови милостивым Твоим оком все посеянныя и насажденныя на полях сих и огородах (виноградниках) здоровью семена; даруй спокойствие воздуха и семена плодовитыми сделай, избавив их от заростания тернием и волчками (дикими травами) и дай им в полную силу придти к назначенному времени, чтобы мы, рабы Твои, насытившись Твоих зрелых плодов, Тебе достойное прославление могли приносить всегда, ныне и присно и во веки веков. Аминь.